انٹرنیٹ جہاں لوگوں کیلئے بہت سے کام کرنے میں آسانی پیدا کرتا ہے وہیں یہ جرائم پیشہ افراد کو باآسانی عام لوگوں کو نشانہ بنانے میں بھی مدد دیتا ہے۔ ایسا ہی ایک قصہ انٹرنیٹ پر ”کیتھی وونگ“ کے نام سے مردوں کو بلیک میل کرنے والی خاتون کا بھی ہے۔ تفصیلات کے مطابق امریکی پولیس کو اس وقت اس خاتون کی تلاش ہے جو اپنے آپ کو کیتھی وونگ کہتی ہے اور انٹرنیٹ پر بے شمار مردوں کو نشانہ بنا چکی ہے۔
یہ خاتون مردوں سے فیس بک پر دوستی کرتی ہے اور پھر ان سے سکائپ پر ویڈیو چیٹ کی درخواست کرتی ہے۔ پھر ان مردوں سے غیر اخلاقی حرکات کرواتی ہے اور خفیہ طور پر ان کی ویڈیو بنالیتی ہے۔ اگلی دفعہ رابطہ کرنے پر وہ ان سے 3 سے 4 ہزار ڈالر تک رقم ادھار مانگتی ہے کہ اس کی دادی بیمار ہے اور پیسوں کی اشد ضرورت ہے۔ انکار پر دھمکی دی جاتی ہے کہ ان کی ویڈیو یوٹیوب پراپ لوڈ کردی جائے گی۔ اس وقت تک 3 طالبعلم اس ہی قسم کی شکایت پولیس کے پاس درج کراچکے ہیں لیکن مقامی پولیس کے مطابق متاثرین کی تعداد اس سے کئی زیادہ ہوسکتی ہے۔ اس حوالے سے نیویارک پولیس کے ترجمان نے طالبعلموں کیلئے وارننگ جاری کی ہے کہ وہ انٹرنیٹ پر ایسے دھوکہ بازوں سے ہوشیار ہیں۔
